Vor hunnertfinfe‘ sibbzisch Johr
Napoljon zooch dorchs Mihledoor.
Seitdem do heeßt’s in unsrer Schdadt,
weil de Napoljon hott’s gesaat: Nix wie enunner!

Zur Pingschtwiss schtreeme ab der Zeit
aus alle Geechende di Leit,
un aach in jeder Zeidung schdeht,
was jeder zu sich selwer seed: Nix wie enunner!

Dann trinkt mer Wein un trinkt aach Bier,
drum gehn di Leit so gern mit dir,
dann schlucksche geeje Hitz un Dorschd
e Waffel, Fisch, e Cörry-Worschd: Nix wie enunner.

Es schleidert dich im Affezahn
di Achder- un di Luupingbahn.
Dei Geld rutscht dir aus deiner Hand,
du bickschd dich, suchschd im Schplitt un Sand: Nix wie enunner!

De Johrmaat wär nor halb so scheen,
geeb’s kee Gewidder un kee Reen.
Dann leeft di Brih dir immerzu
de Buckel nunner in di Schuh: Nix wie enunner!

De Johrmaat wär di Metropol
for Honecker un aach de Kohl.
Di zwee, di keeme nit ze schbeed,
wi’s in de Bollidik meischt geht: Nix wie enunner!